Nagħmlu l-aqwa użu mill-artijiet pubbliċi

8,000 metru kwadru ta’ spazji miftuħa f’żoni urbani

L-art fil-Gżejjer Maltin minn dejjem kellha valur għoli ħafna minħabba l-popolazzjoni numeruża għad-daqs ta’ pajjiżna. Fl-aħħar snin, il-valur tal-art kompla jgħola ‘l fuq b’mod konsistenti minħabba li kien hawn domanda b’saħħitha fis-suq. Fid-dawl ta’ dan, il-mod kif tiġi immaniġġjata l-art pubblika sar aktar importanti minn qatt qabel. Gvern Laburista qed imexxi ‘l quddiem politika li tħeġġeġ l-aħjar użu tal-art pubblika. Wieħed mill-modi kif din il-politika twettqet kien permezz tal-ħolqien ta’ aktar spazji ħodor u miftuħa f’żoni urbani għat-tgawdija tal-poplu.

L-Awtorità tal-Artijiet għandha rwol importanti fl-immaniġġjar ta’ artijiet u propjetajiet pubbliċi. Funzjoni kritika tal-Awtorità hija li tassigura li l-gvern jagħmel l-aħjar użu mill-art tiegħu għall-iżvilupp ekonomiku u soċjali ta’ pajjiżna bl-aktar mod sostenibbli.

Din il-ġimgħa permezz ta’ ħidma konġunta bejn l-Awtorità tal-Artijiet u l-Aġenzija Project Green neddejna proċess biex jinstabu artijiet tal-Gvern f’żoni urbani u li jifformaw parti miż-żona tal-iżvilupp biex nikkonvertuhom fi spazji miftuħa, ħodor.

F’din l-ewwel parti ta’ dan il-proċess identifikajna 8,000 metru kwadru ta’ artijiet f’erba’ lokalitajiet f’Malta. Il-lokalitajiet huma Ħal Luqa, Ħal Kirkop, Ħal Lija u San Ġiljan. Kieku dawn l-artijiet kellhom jinbiegħu għall-iżvilupp, il-valur fis-suq tagħhom kien ikun ta’ €20 miljun. Għalhekk, il-Gvern seta’ faċilment jagħżel li jibni dawn l-artijiet. Minflok mexa għal dik id-direzzjoni, ħass li għandu jipprovdi pulmun ġdid lir-residenti billi jikkonverti dawn l-ispazji miftuħa, ħodor. Spazji li se jkunu aċċessibbli għan-nies u fl-istess waqt se jservu ta’ pulmun fil-lokalitajiet tagħna.

Kif wegħdna fil-programm elettorali Malta Flimkien, il-Gvern jinsab impenjat li jkompli jwettaq proġetti ta’ urban greening bil-għan li noħolqu aktar spazji miftuħa, siguri u ħodor fiċ-ċentri urbani tagħna.

Sabiex jintlaħaq dan il-għan l-Awtorità tal-Artijiet se tkun qed taħdem spalla ma’ spalla mal-Gvern u se tkompli taħdem biex ikun hemm aktar inizjattivi ta’ dan it-tip li permezz tagħhom jibbenefikaw il-komunitajiet tagħna.

Dan kollu jorbot ukoll mal-ħidma tal-Gvern li noffru kull persuna spazju miftuħ 10 minuti bogħod mir-residenza fejn tgħix. Inizjattiva ambizzjuża imma li bħala Gvern mhux se naqgħtu qalbna milli nwettquha.

Sostenn lill-Kunsilli Lokali

Il-Kunsilli Lokali jwettqu xogħol importanti ħafna fil-lokalitajiet tagħna. Il-Gvern jirrikoxxi l-ħidma sfieqa li qed issir u għalhekk irrid jkompli jagħti aktar għodod lill-Kunsilli biex filwaqt li jkun ta’ sostenn għalihom, jtaffilhom mill-ispejjeż involuti fil-proġetti li jwettqu fil-komunitajiet tagħna. L-Awtorità tal-Artijiet qed tkompli tikkollabora mal-Kunsilli Lokali biex tkun faċilitata d-devoluzzjoni ta’ art jew propjetajiet pubbliċi. Ix-xahar li għadda neddejt skema ġdida mill-Awtorità tal-Artijiet flimkien mas-Segretarju Parlamentari għall-Gvern Lokali Alison Zerafa Civelli li permezz tagħha l-Kunsilli Lokali kollha f’Malta u Għawdex se jkunu qed jibbenefikaw minn rati baxxi ta’ kirjiet ta’ art jew propjetà pubblika. Tkun xi tkun l-art jew propjetà mikrija mingħand l-Awtorità tal-Artijiet, il-massimu tal-kera li tista’ titħallas ikun biss ta’ €500. Permezz ta’ din l-iskema  l-Kunsilli Lokali se jkunu jistgħu joffru aktar servizzi lill-komunitajiet tagħhom billi ser jonfqu inqas f’kirjiet. Fil-fatt hemm bosta Kunsilli lokali li se jiffrankaw eluf ta’ ewro b’din l-iskema fosthom dawk ta’ Biżebbuġa u taż-Żurrieq.

Is-Settur tal-volontarjat

Is-settur tal-volontarjat huwa settur għal qalbi ħafna. Mingħajr is-settur tal-volontarja ħafna proġetti ta’ fejda ma jkunux jistgħu jsiru. Jeħtieġ li mhux biss inkomplu nirrikonoxxu s-sehem strumentali tal-volontarjat fis-soċjetajiet tagħna, imma bħala Gvern nkunu ta’ sostenn għal dawn l-għaqdiet.

L-Awtorità tal-Artijiet ser tkompli toffri għajnuna lill-għaqdiet volontarji billi ssib akkommokazzjoni addattata għalihom b’rati vantaġġużi ħafna. Fl-istess waqt, kif wegħdna fil-Manifest fil-futur qarib se jkunu qed inniedu skema ta’ konsolidament tattitoli ta’ għaqdiet volontarji li jkunu ilhom jokkupaw propjetà għal ammont ta’ snin u jkunu jixtiequ jkattru l-kontribut fis-soċjetà.

Dan huwa Gvern li tassew ipoġġi n-nies fiċ-ċentru tal-ħidma tiegħu għaliex jinvesti direttament fin-nies u fil-komunitajiet tagħna. Is-suċċess ekonomiku li għamilna fl-aħħar snin kien il-pedament tal-bidla pożittiva li wettaqna f’kull qasam tal-ħajja. Gvern Laburista biss jista’ jiggarantixxi aktar suċċess biex inkomplu noffru kwalità ta’ ħajja aħjar lill-familji tagħna.

/by

Min għandu s-soluzzjonijiet

Id-diskussjoni politika f’pajjiżna, aktar ma jgħaddi z-zmien, aktar turi b’mod ċar min jista’ joffri l-aħjar soluzzjonijiet għal pajjiżna.

Il-passat riċenti jurina biċ-ċar min jista’ joffri l-aħjar formola għal pajjiżna biex ikompli jikber ekonomikament, jibqa’ pajjiż mimli opportunitajiet u fuq kollox pajjiż li jkompli jaħdem biex itejjeb il-livell tal-għajxien tal-poplu tiegħu.

Jekk wieħed iħares ftit tas-snin lura, mill-ewwel wieħed jintebaħ kif l-ekonomija ta’ pajjiżna, minn waħda kajmana, waħda li taqta’ lura, waħda mifnija bil-qagħad, waħda li ma toffrix il-fiduċja biex nattiraw l-investiment, saret ekonomija ta’ suċċess. Flimkien ksibna ekonomija li toħloq ix-xogħol b’rati bla preċedent, ekonomija li kattret il-ġid u li attirat bosta lejn pajjiżna.

Ta’ min wieħed jgħid, li ekonomija li tkun qed tgħotor, ekonomija li ma tiflaħx terfa’ l-piz tagħħa stess kif kienet l-ekonomija ta’ pajjiżna fl-aħħar snin ta’ amministrazzjoni tal-Partit Nazzjonalista, ħija sors ta’ sfidi u diffikultajiet li jistgħu jingħelbu biss permezz ta’ tkabbir ekonomiku. Dak huwa li wettaq dan il-gvern sa mill-ewwel jiem li ingħata mandat b’saħħtu biex imexxi lil pajjiżna.

Ekonomija li tkun qed tagħmel suċċess, wkoll toffri sfidi ġodda u differenti. Dan iwassal biex filwaqt li nkomplu nsostnu l-andament ekonomiku, rridu niżguraw li l-isfidi li dan is-suċċess igib miegħu irid jigu indirizzati wkoll. Il-ħidma tal-gvern immexxi mill-Prim Ministru Robert Abela qiegħed iwettaq ħidma biex dan iseħħ.

Mill-banda l-oħra, l-oppożizzjoni Nazzjonalista qed tagħzel li taġixxi xort’oħra. Oppożizzjoni li qed tonqos milli tressaq proposti meħtiega għal pajjiżna. Fin-nuqqas ta’ viżjoni li għandha għal pajjiżna, l-oppożizzjoni qed tagħzel li tkun oppożizzjoni populista. Oppożizzjoni li tagħzel li tipprova taqta’ qalb in-nies. Oppożizzjoni li tara kif tittanta li tibgħat messaggi li huma l-kontra ta’ dak li huwa meħtieġ għal pajjiżna.

Meta tara l-mod kif il-Partit Nazzjonalista mexxa lil pajjiżna fl-aħħar snin tat-tmexxija tiegħu, wieħed jirrealizza xi jwassal biex il-PN jibgħat messaġġ negattiv. Huwa riżultat tal-fatt li ma inbidlux, għadhom l-istess, jistgħu jinbidlu l-uċuħ imma l-ħsieb politiku għadu l-istess. Ħsieb politiku favur l-awsterita’, li jitfgħu il-piżijiet fuq in-nies imbagħad jippruvaw iwaħħlu f’xi ħaġa oħra jew ħaddieħor għal politika skaduta taghħom.

Aktar minn hekk, fin-nuqqas ta’ viżjoni għall-ġejjini ta’ pajjiżna, biex jidhru sbieħ, kull ma jagħmlu huwa li jippruvaw jirkbu fuq sentiment negattiv u minflok joffru s-soluzzjonijiet ikunu populisti. Dan it-tip ta’ aġir ma jbiddel xejn anzi joħloq problemi u diffikultajiet ġodda. Iwassal għall-firda u nuqqas ta’ rispett.

Fit-8 ta’ Gunju il-poplu Malti għandu opportunità biex mill-ġdid jibgħat messaġġ. Messaġġ b’saħħtu favur politika li toħloq il-ġid. Politika li toffri s-soluzzjoni t-tajba għal pajjiżna. Bil-vot tagħna nibgħatu messaġġ li ma rridux politika populista imma politika li toffri vizjoni sostenibbli għall-gejjini ta’ pajjiżna.

/by

It-twettiq tal-Programm Elettorali

Stefan Zrinzo Azzopardi – Ministru għall-Artijiet u l-Implimentazzjoni tal-Programm Elettorali

Il-programm elettorali tal-Partit Laburista Malta Flimkien huwa imnebbaħ minn 100 idea li wasslu għat-tfassil ta’ 1000 proposta. Dawn il-proposti qed jinbidlu f’1000 inizjattiva ta’ gvern li qed iwettaqhom waħda wara l-oħra għax aħna nemmnu li dak li nwegħdu irridu nwettquh.

Imma dawn il-100 idea li wasslu għall-1000 proposta minn x’hiex kienu imnebbħa? Huwa ċar li l-ħsieb politiku tal-Partit Laburista u l-ħidma li qed iwettaq il-gvern immexxi minn Robert Abela huwa msejjes fuq ir-rieda li pajjiżna jkollu ekonomija progressiva. Ekonomija li taħdem biex jinħoloq il-ġid. Ekonomija li tkun sostnuta minn sistema li tiżgura li l-ġid jasal għand kulħadd.

Il-ħsieb politiku tagħna huwa wieħed ċar li jwarrab l-awsterità. Rajna f’pajjizna fi żmien gvern Nazzjonalista kif pajjiżna staġna, kif żdied il-qagħad, kif inħolqu diffikultajiet kemm għall-ħaddiema u kull min iħaddem għaliex intgħazlet it-triq tal-awsterità.

Dak li fassalna qabel l-elezzjoni ġenerali tal-2022, illum qed isir realtà. Qegħdin inwettqu dawn il-proposti b’ħidma kollettiva, ħidma flimkien bħala gvern. Gvern li jibqa’ mnebbaħ minn rieda b’saħħitha biex naraw li kulħadd jirnexxi fis-socjetà Maltija.

Minkejja l-isfidi kollha li hemm madwarna, xorta waħda għaddejjin bil-ħidma kif fassalniha. Mhux biss, qegħdin naraw li l-mod kif nimplimentaw il-programm elettorali nagħtu priorita’ sħiħa biex nizżguraw li nkunu ta’ spalla fejn l-aktar li hemm bżonn.

Fost il-proposti ewlenin li ġew mwettqa, fil-manifest elettorali nsibu ż-żieda fl-Allowance tat-Tfal b’€450 kull wild, b’żieda ta’ €90 fis-sena għal ħames snin. Ma waqafniex hemm. is-sena li għaddiet biex ngħaġġlu t-twettiq ta’ din il-miżura żidna l-ammont minn €90 għal €250 kull wild. Permezz ta’ din il-miżura ser nolqtu aktar minn 41,000 familja bi 62,000 tifel u tifla. Din il-miżura turi biċ-ċar kemm Gvern Laburista għandu għal qalbu l-familji tagħna u flok qed jitfa’ l-piżijiet fuqhom qed jtaffilhom mill-piżijiet li għandhom.

Kien hemm ukoll l-introduzzjoni ta’ mekkaniżmu ġdid, apparti l-COLA, li ser ikun qed jikkumpensa b’mod aktar b’saħħtu l-għoli tal-ħajja. Dan se jkun qed jgħin lil dawk bl-aktar dħul baxx, speċjalment dawk fuq pensjonijiet u benefiċċji soċjali.

Proposta oħra ambizzjuża li l-Gvern żamm kelmtu dwarha u implimentaha f’anqas minn sentejn mill-elezzjoni hija dik li jgħin lill-Maltin u Għawdxin ikunu sidien ta’ djarhom. Il-Gvern se jkompli jsostni l-iskemi tal-first-time u tas-second-time buyers. Kif mwiegħed ukoll fil-manifest qed joffri għajnuna lil dawk li jkunu qegħdin jixtru l-ewwel residenza tagħhom billi qed iħallas €1,000 fis-sena fuq il-pagament tas-self għal għaxar snin. B’hekk, b’kollox qed joffri €10,000 f’għajnuna diretta lil min qiegħed jixtri l-ewwel residenza  tiegħu.

Bidla importanti li twettqet matul dawn is-sentejn hija l-introduzzjoni tat-trasport pubbliku b’xejn għal kulħadd. Din mhux biss tħalli aktar flus fil-bwiet il-familji imma hija mezz kif inħeġġu mezzi alternattivi ta’ trasport. Issa anke s-servizz tal-ferry bejn il-Kottonera u l-Belt u tas-Sliema u l-Belt sar b’xejn biex inkomplu ngħinu f’dan ir-rigward. Matul din il-leġiżlatura l-Gvern żamm kelmtu kif wiegħed fil-manifest u qed isostni dawn l-inċentivi biex aktar nies jużaw dawn il-mezzi bl-għan li jnaqqas it-traffiku fit-toroq tagħna fost oħrajn. Fl-istess waqt, il-Gvern qed ikompli jagħmilha aktar faċli u affordabbli għal min irid jixtri karozza elettrika. F’din il-leġiżlatura ddaħħlu inċentivi ġodda u tjiebet l-għotja finanzjarja eżistenti biex b’dan il-mod ninċentivaw ix-xiri ta’ vetturi elettriċi, inkluż ta’ karozzi second-hand.

Proposta oħra li ser tkompli tixpruna ‘l quddiem il-ħidma tal-Gvern fil-qasam soċjali u li diġa’ qed titwettaq hija dik li jiġu identifikati aktar binjiet pubbliċi sabiex jiġu rriġenerati għal skopijiet soċjali b’kollaborazzjoni ma’ għaqdiet volontarji. Din hija miżura oħra li qed tħalli ħafna frott u qed toffri għajnuna kbira lill-għaqdiet volontarji li jagħmlu tant xogħol siewi fis-soċjetà.

Il-Gvern dejjem saħaq li waħda mill-funzjonijiet kritiċi tal-Awtorità tal-Artijiet hija dik li tgħin lis-settur tal-volontarjat. Kif wegħdna fil-manifest elettorali, għaqdiet volontarji qed ikomplu jgawdu minn binjiet addatti għalihom b’rati vantaġġużi ħafna. Barra minn hekk, neddejna wkoll skema ta’ konsolidament tat-titoli ta’ għaqdiet volontarji li jkunu ilhom jokkupaw propjetà għal ammont ta’ snin u jkunu jixtiequ jkattru l-kontribut tagħhom fis-soċjetà. Introduċejna wkoll skema biex il-Kunsilli Lokali ma jħallsux aktar minn €500 fis-sena għal kirjiet ta’ postijiet jew artijiet pubbliċi li jakkwistaw mill-Awtorità tal-Artijiet.

Jekk wieħed jara l-proposti li twettqu jinotta li l-Gvern kien dejjem fuq in-naħa tan-nies. Il-prijorità tagħna bħala Gvern huwa li naraw kif in-nies ikollhom livell ta’ għejxien aħjar.

Minbarra t-twettiq ta’ dak li twiegħed mill-Partit hemm imbagħad xogħol ieħor. Minn dak li qedgħin nwettqu rridu nkomplu diskussjoni wiesgħa dwar kif se nkomplu bil-ħsieb politiku tagħna biex nindirizzaw realtajiet ġodda li qed niffaċċjaw filwaqt li nkomplu nfasslu l-viżjoni tagħna għall-ġejjieni.

Fiż-żmien li ġej, il-poplu se jkun imsejjaħ biex jagħti l-vot tiegħu fl-elezzjonijiet tal-Parlament Ewropew u l-Kunsilli Lokali. Jeħtieġ li bil-vot tagħna nibgħatu messaġġ car li l-poplu Malti irid ekonomija progressiva, ekonomija li toholoq il-ġid u tmexxija ekonomika li tiżgura li l-ġid jasal għand kulħadd.

/by

Kapitlu Ġdid

Id-dover tagħna fil-politika huwa li nfasslu l-passi li jeħduna lejn il-futur. Li nagħmlu għażliet li jħejjuna għal dak li ġej, filwaqt li nwettqu dak meħtieġ biex inwieġbu għar-realtajiet tal-preżent. Dawn l-għażliet għandhom ikunu mnebbħa mill-viżjoni politika tagħna. Mill-ideali li nħaddnu, mill-ħsieb politiku li jiddistingwina.

Fl-għażliet tagħna, f’dak li fassalna qabel l-aħħar elezzjoni, il-miżuri li qegħdin inwettqu, ilkoll juru biċ-ċar li aħna rridu nwettqu politika li tagħtina ekonomija progressiva.

Ekonomija li toħloq il-ġid u qafas soċjali u ekonomiku li jiżgura li l-ġid jasal għand kulħadd. Huwa ħsieb imnebbaħ minn dak mistqarr fl-istatut tal-Partit Laburista li b’ħidmitna għandha “sseħħ il-ġustizzja soċjali u li s-saħħa tal-istess soċjetà, titkejjel mill-progress ta’ dawk l-iktar dgħajfa fost il-membri tagħha.”

Fl-għażliet tagħna urejna f’kull okkażjoni li bħala Gvern ma nemmnux f’politka ta’ awsterità. L-awsterità meta mħaddma minn gvern Nazzjonalista lkoll nafu x’riżultati tatna. Ilkoll nafu x’konsegwenzi ħolqot fuq il-kwalità tal-ħajja tal-familji Maltin u Għawdxin. L-awsterità wasslet biex l-ekonomija ta’ pajjiżna tistaġna. Ħolqot livelli għolja ta’ qagħad. Naffret l-investiment minn pajjiżna u tefgħet piżijiet iebsa fuq il-poplu.

Dak li qed inwettqu huwa għal kollox differenti. Il-miżuri li wettaqna u li se nkomplu nwettqu fiż-żmien li ġej huma mfassla biex inkomplu ntejjbu l-livell ta’ għajxien tal-familji kollha, niżguraw li f’pajjiżna jibqa’ jinħoloq ix-xogħol, intejjbu l-kundizzjonijiet tax-xogħol filwaqt li nħejju lil pajjiżna għall-ġejjieni.

Filwaqt li qegħdin inwettqu dan kollu, huwa xieraq li bħala Partit Laburista niċċelebraw u nfakkru dak li fl-imgħoddi welled lill-Partit Laburista. Infakkru l-kuraġġ li wrew missierijietna fil-Partit biex bdew il-ħidma politika tagħhom. Id-determinazzjoni tagħhom biex iwelldu partit li jkun moviment favur il-bidla f’pajjiżna. Partit li jservi ta’ xprun għal bidla soċjali, li jinstiga qawwa biex il-poplu jikseb aktar drittijiet, jikseb il-ħelsien u jikseb il-ġieħ li jixraqlu. Partit li mill-bidu tiegħu wera li jagħmel l-affarijiet differenti meta kellu fost il-fundaturi tiegħu mara u omm fi żmien ta’ inugwaljanza kbira.

Iċ-ċelebrazzjoni tal-bidu tal-Partit Laburista bit-tema Kapitlu Ġdid mhux biss tirrakkonta kif issawwar il-Partit Laburista. Mhux biss turi b’dokument storiku kif il-fundaturi tal-Partit bdew il-ħidma politika tal-Partit, mhux biss tispjega min kienu dawk li ingħaqdu biex għall-ewwel darba twieled Partit li mill-bidu tiegħu kien imsemmi Partit Laburista, imma turi biċ-ċar il-ħsieb progressiv tal-Partit sa mit-twaqqif tiegħu.

Dak li seħħ ftit aktar minn mitt sena ilu, wera biċ-ċar x’inhu d-destin tal-Partit Laburista. Juri biċ-ċar l-għanijiet li għalih twaqqaf il-Partit. Imma hija ċelebrazzjoni tal-kisbiet kollha li għamel pajjiżna bil-ħidma politika Ii twettqet matul is-snin. Hija okkażjoni li nġeddu il-wegħda tagħna li nkunu l-forza progressiva li ġġib bidla, bidla għall-aħjar, bidla li tfisser ġustizzja soċjali, opportunitajiet għal kulħadd, xogħol u ħolqien ta’ ġid li jkompli jmexxi s-soċjetà tagħna li fiha kulħadd jista’ javvanza.

/by

ĦIDMA QRIB IL-KUNSILLI LOKALI

Illum hawn qbil ġenerali li l-Kunsilli Lokali ġabu bidla pożittiva fil-lokalitajiet Maltin u l-Għawdxin. Ħafna jaqblu wkoll li forsi wasal iż-żmien li nagħmlu l-bidliet li hemm bżonn biex il-kunċett ta’ gvern lokali ikompli jissaħħaħ u jekk ikun il-bżonn, jinbidel għall-aħjar. Imma mingħajr l-ebda dubju, li sakemm għandna s-sistema li għandna bħalissa, huwa importanti ħafna li l-Kunsilli Lokali nkomplu nsostnuhom bl-aħjar mod biex ikunu jistgħu jaqdu l-funzjonijiet tagħhom li jipprovdu l-aqwa servizzi lill-kommunitajiet tagħna.

Kull propjetà jew art li l-Awtorità tal-Artijiet tgħaddi lill-Kunsilli Lokali, ma tħallasx aktar minn €500 f’kirjiet għal din id-devoluzzjoni.

Bosta drabi, miżuri meħudha mill-Gvern Ċentrali jistgħu ikunu ta’ sostenn mill-aqwa lill-Kunsilli Lokali. Mhux biżżejjed l-allokazzjonijiet finanzjarji li jiġu mgħoddija lilhom ta’ kull sena. Il-Kunsilli għandhom bżonn ukoll tip ta’ għajnuniet oħra li jkunu ta’ sostenn għalihom. Bħalma sostnejnihom fis-snin li għaddew bi proġetti li kienu ffinanzjati mill-Fond tal-Iżvilupp tal-Ippjanar tal-Awtorita tad-Ippjanar. Sostnejnihom ukoll b’għajnuna ta’ xogħlijiet pubbliċi.

Hekk kif ftit ġimgħat ilu ġejt fdat mill-Prim Ministru Robert Abela bl-inkarigiu tal-Awtorità tal-Artijiet mill-ewwel rajt kif b’din l-Awtorita li tamministra tant propjetajiet tal-Gvern, tkun tista’ tgħin ukoll lill-Kunsill Lokali. Kien għalhekk li ħabbarna inizjattiva biex kull propjetà jew art li l-Awtorità tal-Artijiet tgħaddi lill-Kunsilli Lokali, ma tħallasx aktar minn €500 f’kirjiet għal din id-devoluzzjoni.

B’din il-miżura, il-Kunsilli Lokali kollha li għandhom fil-pussess tagħhom xi art jew propjetà tal-Gvern, minn issa ‘l quddiem se jibdew iħallsu biss €500 fis-sena għal kull propjetà pubblika li jkunu qed jamministraw. Hemm Kunsilli Lokali li se jibbenefikaw minn roħs ta’ eluf ta’ Ewro f’kirjiet kull sena.

B’din il-miżura, il-Kunsilli Lokali se jkunu jistgħu jużaw dawn il-fondi iffrankati f’aktar servizzi lill-kommunitajiet tagħhom.

F’mument meta qed noqorbu lejn it-tiġdid tal-Kunsilli Lokali bl-elezzjonijiet tat-8 ta’ Ġunju li ġej, il-Kunsilli Lokali għandu jkollhom l-appoġġ kollu meħtieġ biex tassew nuru x’ġid qed iwettqu fl-ibliet u l-irħula tagħna. Appoġġ li għandu jingħata għall-ħidma li ssir b’dedikazzjoni u impenn favur il-lokalitajiet.

/by

Il-Kelma mal-Elettorat

“Dħalt għal dan l-inkarigu b’impenn kbir biex il-kelma li tajna lill-elettorat inżommuha.”

F’Marzu tal-2022, il-Partit Laburista reġa’ ingħata mandat ieħor b’saħħtu mill-poplu sabiex ikompli jmexxi lill-pajjiżna. Il-fiduċja li ntweriet fina qiegħda tissarraf f’riżultati pożittivii mill-Gvern. Se nkomplu nżommu kelmtna mal-elettorat billi nwettqu dak li wegħedna.

Fid-dawl ta’ x’qed jiġri madwarna, dan jitfa’ fuqna responsabbiltà akbar, iżda jqanqal fina aktar impenn, enerġija u determinazzjoni biex nuru bil-fatti lill-elettorat li l-Partit Laburista fil-Gvern jibqa’ joffri viżjoni b’saħħitha għall-futur.

Fl-aħħar jiem il-Prim Ministru Robert Abela reġa’ saħaq fuq l-impenn tal-Gvern li jara li tissaħħaħ il-ħidma tiegħu biex dak li wegħedna fil-programm elettorali ‘Malta Flimkien’ jitwettaq.

Il-Prim Ministru għoġbu jagħtini responsabbiltà ġdida biex insaħħu l-kordinazzjoni fix-xogħol mal-Ministeri l-oħra kollha biex niżguraw l-implimentazzjoni tal-1,000 proposta fil-Manifest. Dħalt għal dan l-inkarigu b’impenn kbir biex il-kelma li tajna lill-elettorat inżommuha.

Fl-aħħar tliet elezzjonijiet in-nies baqgħu jagħtu l-fiduċja tagħhom lill-Partit Laburista għax jridu jimxu lejn bidla pożittiva u lejn aktar tiġdid fil-pajjiż. Il-Partit Laburista f’dawn l-aħħar snin kemm ilu fit-tmun tal-pajjiż wera biċ-ċar li huwa partit miftuħ għal kulħadd, partit li lest li jisma’ u jieħu l-aħjar deċiżjonijiet fl-aktar mumenti diffiċli. Fuq kollox il-Partit Laburista għandu track record li dak li jwiegħed iwettqu.

Minkejja l-pandemija globali u minkejja r-rata ta’ inflazzjoni għolja pajjiżna xorta waħda baqa’ jirreġistra tkabbir ekonomiku b’saħħtu. Waqt li pajjiżi oħra Ewropej ferm akbar minna kienu qed jogħtru quddiem il-kriżijiet internazzjonali, f’Malta komplejna naraw tnaqqis fil-qgħad u r-rata ta’ nisa b’impjieg qabżet għall-ewwel darba l-medja tal-Unjoni Ewropea. Dan ma ġiex b’kumbinazzjoni imma għax il-Gvern ħadem b’għaqal. Kieku l-ekonomija ma kinitx b’saħħitha, il-Gvern ma kienx se jkun jista’ jidħol bħala tarka biex jilqa’ għall-piżijiet.

Waħda mill-aqwa kwalitajiet tal-Partit Laburista li qed tidher fil-ħidma tagħna hi li fl-għażliet li nwettqu nippremjaw il-bżulija u niżguraw li l-ġid li jinħoloq ikun ta’ sostenn għal kulħadd. B’dan il-mod qed jgħin lil faxex kollha b’mod partikolari l-aktar vulnerabbli fis-soċjetà tagħna. Dan huwa turija tal-prinċipji tagħna li dejjem ħaddanna u se nkomplu nħaddnu bħala partit.

Bil-kontra, il-Partit Nazzjonalista jibqa’ jipprova jintgħoġob ma’ kulħadd u partit li baqa’  ankrat fil-passat. Jibża’ mit-tiġdid u mill-bidla, u mhux kapaċi jieħu deċiżjonijiet diffiċli biex mingħalih jibqa’ jfuħ ma’ kulħadd. Partit li għadu jitmexxa minn fazzjoni żgħira ta’ nies li jaħsbu li għandhom xi dritt divin imexxu l-pajjiż.

Meta jkun hemm problemi ekonomiċi l-Partit Nazzjonalista mhux kapaċi jservi ta’ tarka għall-poplu bħall-Partit Laburista, imma kif rajna fil-passat il-piżijiet jitfagħhom fuq in-nies.

Inwettqu l-proposti tal-manifest elettorali

Minkejja li għadhom  għaddew ftit anqas minn sentejn mill-bidu ta’ din il-leġiżlatura, il-Gvern diġa’ wettaq għadd kbir ta’ proposti mill-Manifest Elettorali.

Żewġ wegħdiet primarji li wettaqna kienu l-introduzzjoni ta’ pensjoni tas-servizz lir-romol ta’ uffiċjali fil-forzi dixxiplinati u t-tisħiħ fil-pensjoni ta’ servizz bi 23% u allowance sostanzjali lil dawk li jagħżlu li jagħtu servizz lil hinn minn 29 sena f’dawn il-forzi.

Bil-proċess li l-Gvern beda fl-2022 biex nindirizzaw l-Bonus tal-Għoli tal-Ħajja dawk li bdew jieħdu l-pensjoni fl-2009 jew wara se jieħdu żieda addizzjonali fil-bonus tal-għoli tal-ħajja tagħhom. Minn din il-miżura qed jibbenifikaw mat-53,000 pensjonant.

Fil-programm elettorali, bħala parti mill-Garanzija għat-Tfal il-Gvern wiegħed li tul din il-leġiżlatura se nżidu l-Allowance tat-Tfal b’€450 kull wild, b’żieda ta’ €90 fis-sena għal ħames snin. Fl-ewwel sena ta’ din il-leġiżlatura bdejna nwettqu din il-proposta. Ma waqafniex hemmhekk, is-sena li għaddiet biex ngħaġġlu it-twettiq ta’ din il-miżura żiedna l-ammont minn €90 għal €250 kull wild.

Permezz ta’ din il-miżura ser nolqtu aktar minn 41,000 familja bi 62,000 tifel u tifla. Dawn ser igawdu minn sotenn ta’ ‘l fuq minn €15-il miljun. Fl-2022, aktar minn 100 miżura soċjali, li jiffurmaw parti mill-Pjan Nazzjonali għall-Garanzija tat-Tfal, ġew implimentati f’erba’ oqsma ewlenin. Minn dawn il-miżuri, 29 miżura huma relatati mal-protezzjoni soċjali, 34 miżura fir-rigward tal-edukazzjoni, 38 miżura relatati mal-kura tas-saħħa u 7 miżuri relatati ma’ akkomodazzjoni adegwata.

Kif ġie mwiegħed fil-Manifest Elettorali, dan il-Gvern indirizza l-problemi marbuta mal-liġijiet tal-qbiela sabiex inserrħu moħħ il-bdiewa ħalli jibqgħu jaħdmu l-art, filwaqt li jingħata kumpens xieraq lis-sidien.

Proposta oħra fil-Manifest Elettorali li l-Gvern daħħal fis-seħħ hi  l-liċenzjar tal-kuntratturi. Għall-ewwel darba seħħ Avviż Legali li jobbliga lil kull kuntrattur li jaħdem fl-oqsma tat-twaqqigħ, skavar u bini biex japplika għal-Liċenzja mal-Awtorità tal-Bini u l-Kostruzzjoni, il-BCA.

Dawn il-liġijiet għandhom l-għan li filwaqt li jirregolaw is-settur tal-kostruzzjoni, jinstigaw aktar responsabbiltà u akkontabiltà. Fl-istess waqt, jiżguraw li jkun hemm titjib fil-livell tal-ħiliet tal-ħaddiema kollha involuti.

Twettqu bosta inizjattivi oħra li lkoll għandhom l-għan li niżguraw li pajjiżna jibqa’ miexi ‘l quddiem u naċċertaw aktar opportunitajiet għal kulħadd.

Fiż-żmien li ġej se nkomplu naħdmu flimkien biex inwettqu dak li wegħedna fil-Manifest Elettorali. Gvernijiet Laburisti dejjem kienu magħrufa bħala gvernijiet li żammew kelmithom mal-elettorat. Ser naħdem biex niżgura li hekk jiġri din id-darba wkoll għaliex ninsab ċert li bit-twettieq tal-proposti tal-Manifest, il-familji kollha Maltin u Għawdxin igawdu minn kwalità ta’ ħajja aħjar.

/by

BIDLA B’KONSULTAZZJONI

Is-sena li wasslet biex tintemm, kienet sena li fiha twettqu bidliet importanti fir-regolamenti marbuta mas-settur tal-kostruzzjoni. Bidliet li kienu jeħtieġu hidma estensiva u li seħħew wara li tkellimna mà kull min huwa involut.

Bidliet li fissirna b’mod kontinwu l-oġġettivi li rridu nilħqu u anke dak li huwa meħtieġ li jsir biex dawn isiru bl-aħjar mod u tal-aqwa benefiċċju għal kulħadd. Dan huwa l-mudell li se nkomplu naddottaw fiż-żmien li ġej.

Biex nistrutturaw b’mod aħjar il-konsultazzjoni kontinwa li jeħtieġ li ssir, waqqafna Kunsill Konsultattiv għall-Bini u l-Kostruzzjoni fi ħdan l-Awtorità tal-Bini u l-Kostruzzjoni. Dan il-Kunsill jirrappreżenta diversi entitajiet marbuta mà dan is-settur. Jirrappreżenta kemm lill-professjonisti kif wkoll operaturi f’dan is-settur flimkien mà entitajiet marbuta mal-edukazzjoni u t-taħriġ.

Il-formola li se jkun qed juża dan il-Kunsill hija li jidentifika issues li jeħtieġ li jiġu indirizzati, issir konsultazzjoni dwar il-proposti li jkunu qed jiġu kkunsidrati u b’hekk l-Awtorità għall-Bini u l-Kostruzzjoni tingħata stampa tal-pożizzjonijiet varji  ħalli b’hekk id-deċizjonijiet jittieħdu bl-aktar mod infurmat.

Il-gvern huwa determinat li jkompli bi pjan strutturat ta’ bidla fil-mod kif jiġi regolat ix-xogħol ta’ kostruzzjoni. Imma din il-bidla trid issir b’tali mod li kull min hu involut ikun parti minn din il-bidla. Huwa essenzjali li min jopera f’dan is-settur ikun kontinwament infurmat bil-bidliet u mħejji bl-aħjar mod biex il-bidla sseħħ kif meħtieġ.

Il-bidliet li se nkomplu nwettqu fis-sena l-ġdida se jibnu fuq dawk li wettaqna matul l-2023. Biddliet importanti li joffru bażi soda biex inwettqu t-tisħiħ regolatorju f’dan is-settur. L-oġġettivi għal din il-bidla li qed inwettqu huwa li fis-settur tal-kostruzzjoni jkollna aktar serjetà, aktar responsabiltà u kwalità ogħla.

Issa li wettaqna bidla importanti bl-introduzzjoni tal-liċenzjar tal-kuntratturi, se nkomplu mexjin ‘l quddiem biex niżguraw li jkollna aktar persuni imħarrġa fuq il-lant tax-xogħol, ikun hemm għarfien akbar dwar sistemi aktar addattati kif għandu jsir ix-xogħol u fuq kollox li jkollna sistemi ta’ xogħol aktar siguri għall-ħaddiema.

Din il-bidla trid issir permezz ta’ regolamenti aktar addattati għal żminijietna iżda mhux regolamenti aġġornati biss hemm bżonn. L-operaturi fis-settur iridu jkunu infurmati aktar dwar il-modi aġġornati kif għandhom isiru l-affarijiet. It-taħriġ huwa essenzjali f’din il-bidla important li qed titwettaq.

Ma’ kull pass li se nagħmlu se jkollna konsultazzjoni wiesgħa dwar kull bidla li hija meħtieġa. L-Awtorità tal-Bini u l-Kostruzzjoni se tkompli tagħti aktar informazzjoni dwar dak li huwa meħtieġ li jsir u l-mod kif il-bidliet se jkunu qed jigu introdotti.

“Il-mod kif ħdimna matul is-sena 2023 se jkun mudell li fuqu se nkomplu inwettqu akar bidliet fiż-żmien li ġej.”

Bidliet tant meħtieġa li jwasslu għal settur li jaħdem b’aktar serjetà, aktar responsabilità u kwalità ogħla.

Nixtieq nieħu din l-opportunità biex nawgura Sena Ġdida mimlija riżq u saħħa lill-Maltin u l-Għawdxin kollha.

/by

L-Istrina 2024 – Poplu Wieħed b’Qalb Kbira

Fl-istil ta’ ħajja tagħna l-Maltin hemm ħafna karatteristiċi li jiddistingwuna – uħud sbieħ u forsi oħrajn inqas. Iżda li hu żgur huwa li aħna popla b’qalb tad-deheb. Qalb li tħoss u tħenn għal min jinsab batut u fil-bżonn u xhieda ta’ dan, bla dubju huwa jum l-Istrina fejn ta’ kull sena l-għada tal-Milied, isir sforz nazzjonali biex jinġabru fondi b’risq il-Malta Community Chest Fund. Din is-sena għal darboħra reġa’ nkiser ir-rekord bis-somma sabiħa ta’ €5.27 miljun.

Minkejja li jkollna diversi inizjattivi ta’ solidarjetà matul is-sena fejn il-poplu Malti dejjem jagħti kontribut, f’dan iż-żmien tal-Milied il-poplu jerġa’ jwieġeb b’aktar saħħa u b’aktar ġenerożità. Kulħadd ikollu l-ispejjeż tiegħu partikolarment f’dan iż-żmien ta’ festi iżda xorta waħda l-maġġoranza tal-Matin jħossu li, minn kif jistgħu, għandhom jgħinu billi jagħtu d-donazzjoni tagħhom. U hekk malli jibda joqrob il-Milied, u tibda tisma’ dik id-domanda kważi spontanja dwar l-Istrina, “tgħid din is-sena tinqabeż is-somma tas-sena li għaddiet?”, ir-risposta tkun “iva”, sena wara l-oħra din is-somma tkompli tikber. Għax il-Maltin iħossu għal ħaddieħor u l-fatt li aħna poplu żgħir, fina hemm l-ispirtu ta’ familja waħda. Familja li tifhem xi jfisser meta jkollok ħabta u sabta tieqaf mir-rutina tal-ħajja u tmur f’pajjiż ieħor għal kura mingħajr ma taf meta se tiġi lura. Illum nistgħu ngħidu li din ir-realtà ħafna minnha missew magħha jew b’esperjenzi personali, jew ta’ qraba jew ħbieb.

Il-Malta Community Chest Fund għalhekk teżisti. Għas-serħan il-moħħ. Li minkejja il-problemi ta’ saħħa, hemm min se jagħmel minn kollox biex jgħinek. Għalhekk ta’ kull sena bi ħġari immur nagħti l-parti tiegħi f’din il-maratona. Din is-sena terġa’ kienet aktar speċjali għax mort flimkien ma’ Silvana, Federico u Emilia. Xi ħaġa sabiħa li fost l-attivitajiet kollha tal-Milied, morna bħala familja biex nagħtu s-sapport tagħna. Waqt li kont hemm ukoll ppreżentajt is-somma sabiħa ta’ €780 li nġabret waqt attività soċjali li oragnizzajna għal żmien il-Milied.

Iżda dan fil-verità huwa farka fejn il-kontribut li jagħtu l-mijiet ta’ voluntiera biex l-Istrina tkun suċċess. U dan mhux biss l-għada tal-Milied, iżda matul is-sena kollha. L-attivitajiet kollha li jiġu organizzati matul is-sena b’risq l-Istrina huma ħafna u x-xogħol li jirrikjedu huwa kbir. U hawn ma nistax ma nsemmix lil President George Vella u s-Sinjura Vella li bla dubju huma l-akbar ambaxxaturi tal-Istrina. Id-dedikazzjoni tagħhom u l-impenn favur din l-iniżjattiva huma tassew speċjali.

Aktar kmieni din is-sena flimkien ma’ Silvana ġejt mitlub nakkumpanja lil President waqt żjara statali fl-Awstralja. Opportunità mill-isbaħ li niltaqa’ ma ħafna Maltin lil hinn minn xtutna li għadhom iħobbu lill-art twelidhom u l-memorji ta’ tfulithom. Kienet iżda fuq kollox opportunità għalija li nsir naf aktar mill-qrib lill-President George Vella. Persuna tassew b’qalbi kbira li forsi anke minħabba l-professjoni li ġej minnha ta’ tabib, kapaċi jifhem u juri kumpassjoni ma min jinsab batut. U propju għalhekk forsi li din is-sena stajt nifhem aħjar xi tfisser għalih il-Malta Community Chest Fund.

Minn qalbi nirringrazzja lil kull min b’xi mod jew ieħor ta l-għajnuna fl-Istrina ta’ din is-sena. Ejja dejjem nħaddnu u ngħożżu dak li jgħaqqadna. Dan huwa impenn soċjali li għandna kollha kemm aħna biex nkunu hemm għal xulxin. Biex nibqgħu dejjem poplu wieħed b’qalb kbira.

/by

Bidliet fl-interess tal-ħaddiema

Din kienet sena ta’ bidliet kbar u importanti li twettqu mill-Ministeru għax-Xogħlijiet Pubbliċi u l-Ippjanar fejn daħħalna numru ta’ riformi importanti fis-settur tal-bini u l-kostruzzjoni. Dawn il-bidliet huma parti mill-programm ambizzjuż ta’ tiġdid li qed jitwettaq mill-Gvern f’dan is-settur bl-għan li nimxu lejn aktar responsabbiltà, serjetà u kwalità ogħla. Fid-dawl ta’ dan, irridu nissottolinjaw ukoll li l-ħaddiema huma l-aktar riżorsa importanti f’pajjiżna. Għalhekk permezz ta’ dawn il-bidliet qed niżguraw li l-ħaddiema jkunu fiċ-ċentru tar-riformi li nwettqu sabiex nipproteġuhom.

Is-settur tal-bini u l-kostruzzjoni kiber b’ritmu mgħaġġel ħafna fl-aħħar snin minħabba li kien hawn domanda akbar għall-propjetà. Dan kien rifless fl-aħħar snin fejn f’pajjiżna kellna attività kbira f’dan is-settur. Minħabba f’hekk inħass il-bżonn li nintroduċu riformi ġodda biex is-settur jiġi regolat aħjar ħalli jirrispekja r-realtajiet ġodda tal-lum u jiżgura li l-ħaddiema jkunu mħarrġa bil-ħiliet neċċessarji biex jaħdmu x-xogħol rikjest minnhom.

Biex inħarsu aħjar is-saħħa u s-sigurtà fuq siti ta’ kostruzzjoni u ndaħħlu aktar kontabbiltà fost dawk li jaħdmu fis-settur fil-bidu ta’ din is-sena neddejna process ta’ konsultazzjoni dwar l-irwol tal-project supervisors. Dan huwa pass pożittiv lejn id-direzzjoni t-tajba biex is-superviżuri tal-proġetti jingħataw is-setgħat kollha meħtieġa f’siti ta’ kostruzzjoni biex jaqdu r-responsabbiltajiet tagħhom. Fl-istess waqt, l-irwoli u r-responsabbiltajiet tal-kuntratturi, il-persuni li jaħdmu għal rashom u l-ħaddiema ġew spjegati f’aktar dettal biex ikun hemm aktar ċarezza dwar ir-responsabbiltajiet tagħhom.

Marbut ma’ din ir-rifoma sabiex niggarantixxu aktar is-saħħa u s-sigurtà fost il-ħaddiema fuq il-postijiet tax-xogħol neddejna White Paper għall-konsultazzjoni pubblika. Din tipproponi fost oħrajn strumenti amministrattivi ġodda li ser jgħinu lill-Awtorità tkun aktar effettiva u effiċjenti fl-infurzar tagħha u żidiet fil-penali amministrattivi li tkun tista’ timponi l-Awtorità.

Riforma oħra kruċjali li daħħalna kienet il-liċenzja tal-kuntratturi biex tirregola lil min iwettaq xogħol ta’ twaqqiegħ, skavar u bini biex tassigura li min jaħdem ikollu l-ħiliet neċċessarji u twassal għal titjib fl-istandards tax-xogħol. Din ir-riforma ġiet imneddija permezz ta’ konsultazzjoni pubblika mill-aktar wiesgħa fejn matulha kellna ċans nisimgħu, niddiskutu u nixtarru sew il-fehmiet tal-partijiet kollha interessati. Wara li intemmet il-konsultazzjoni pubblika daħħlet fis-seħħ l-ewwel fażi ta’ din ir-riforma bir-reġistrazzjoni ta’ aktar minn 3,793 kuntrattur fl-oqsma tat-twaqqiegħ, skavar u bini. B’kollox applikaw 1,754 kuntrattur għal-liċenzja tal-kostruzzjoni, 1,233 għal-liċenzja tat-twaqqiegħ u 806 kuntratturi għal-liċenzja tal-iskavar. Dan juri biċ-ċar li dan is-settur huwa wieħed b’saħħtu u jinkludi fih mijjiet kbar ta’ ħaddiema.

Il-bidla fil-liċenzja tal-bennej ser taħdem id f’id ma’ dik li rat l-introduzzjoni tal-liċenzja tal-kuntratturi hekk kif wieħed mir-rekwiżiti biex tinkiseb din il-liċenzja hija dik ta’ bennej. Permezz ta’ din ir-riforma se jiġu ċċarati l-ħiliet u r-responsabbiltajiet ta’ min ikollu l-liċenzja tal-bennej. Sabiex il-bennejja liċenzjati jibqgħu jiġu aġġornati mat-tibdiliet fis-settur se jkunu wkoll introdott l-obbligu ta’ taħriġ kemm għall-bennejja li diġà huma liċenzjati meta jaslu biex iġeddu l-liċenzja tagħhom kif ukoll dawk li japplikaw għall-ewwel darba.

Inwettqu Flimkien: Minister for Public Works and Planning Stefan Zrinzo Azzopardi launches a Public Consultation on the Licensing of Contractors

L-introduzzjoni tal-liċenzja tal-kuntratturi u l-bidla fil-liċenzja tal-bennej li qed issir din is-sena, se tkun qed tiġi segwita b’aktar inizjattivi biex tiġi sostnuta aktar responsabbiltà, aktar serjetà u kwalità ogħla fis-settur tal-kostruzzjoni. Fiż-żmien li ġej ser tkompli l-ħidma biex jiġu introdotti skill cards għal min jaħdem f’dan is-settur filwaqt li mistenni jitkompla x-xogħol biex jibdew jiġu introdotti l-kodiċi tal-bini f’pajjiżna.

Nemmnu bi sħiħ li l-ħaddiema jixraqilhom u huwa essenzjali li jkollhom aktar taħriġ. Dan biex ngħollu l-livell ta’ dak li qed nibnu f’pajjiżna, fuq kollox aktar taħriġ għal aktar saħħa u sigurtà f’dan is-settur. Mill-banda l-oħra, il-ħaddiema għandhom bżonn jieħdu ħsieb aktar ta’ saħħithom meta jkunu qed jaħdmu f’siti ta’ kostruzzjoni. L-Awtorità għas-Saħħa u s-Sigurtà fuq il-Post tax-Xogħol se tkun qed twettaq kampanji b’saħħithom ta’ għarfien biex tqajjem aktar kuxjenza dwar is-saħħa u s-sigurtà fost il-ħaddiema li jaħdmu fil-bini u l-kostruzzjoni.

Il-ħaddiema huma fiċ-ċentru ta’ dawn ir-riformi u fiċ-ċentru tal-ħidma tal-Gvern. Għaldaqstant, se nibqgħu kommessi li naħdmu u nixprunaw ‘il quddiem bidliet fis-settur tal-kostruzzjoni biex inħarsu u nipproteġu lill-ħaddiema waqt il-qadi ta’ dmirijiethom. Madanakollu, dawn il-bidliet jistgħu jirnexxu biss bl-involviment u l-parteċipazzjoni sħiħa tal-partijiet kollha interessati. Għalhekk nappella lil kull min b’xi mod jew ieħor huwa involut fis-settur tal-bini u l-kostruzzjoni biex ikun parti mill-bidla li qed nwettqu biex nimxu għal kwalità ogħla f’dan is-settur u nħarsu s-saħħa u s-sigurtà ta’ dawk li jaħdmu fis-settur.

/by

Aktar proġetti sostenibbli għall-ġid tal-komunità

L-ambjent li ngħixu fih u l-kwalità tal-ħajja huma importanti ħafna. Il-Gvern huwa konxju tal-importanza li l-Maltin u l-Għawdxin jgħixu kwalità ta’ ħajja tajba u għalhekk huwa impenjat li jkompli jaħdem qatigħ biex jagħti dehra isbaħ u aktar vibranti lill-lokalitajiet tagħna fejn ikun hemm sens akbar ta’ komunità, aktar spazji miftuħa għall-familji u faċilitajiet aħjar u aktar moderni.

Id-Dipartiment tax-Xogħlijiet Pubbliċi huwa fiċ-ċentru ta’ din il-ħidma. Il-ħidma mwettqa mid-Dipartiment tax-Xogħlijiet Pubbliċi hija waħda mifruxa u tmur lil hinn minn xogħol ta’ manutenzjoni u tiswijiet fuq it-toroq u fuq il-bankini kif forsi wħud jaħsbu. Ix-xogħol tad-Dipartiment huwa wieħed ta’ appoġġ għall-kommunitajiet tagħna fl-ibliet u l-irħula Maltin. Dan jinkludi xogħol f’ġonna pubbliċi u f’parks, xogħol ta’ tisbieħ ambjentali kif ukoll xogħol ta’ restawr u rinovar ta’ binjiet li nsibu fil-lokalitajiet tagħna.

Id-Dipartiment tax-Xogħlijiet Pubbliċi qed iservi ta’ spalla u qed joffri assistenza importanti f’ħidmiet li qed nagħmlu fuq livell lokali mal-Kunsilli Lokali kif ukoll ma’ għaqdiet non-governattivi. F’dawn l-aħħar snin dan id-Dipartiment għadda minn process ta’ trasformazzjoni għax qed jimmira li jkun konformi mal-miri tat-tibdil fil-klima u l-iżvilupp sostenibbli. Dan jinkludi l-irrinovar tal-binjiet li jintużaw, investiment f’makkinarju ġdid, sistemi tat-tekonoloġija tal-informatika moderna u taħriġ tal-ħaddiema. Wara li sar l-irrinovar ta’ Project House biex saret binja kważi ħielsa mill-emmissjonijiet tal-karbonju, kien imiss lid-diversi uffiċini distrettwali tad-dipartiment li jibdew jiġu rinovati kif fil-fatt qed isir bħalissa.

Fid-dawl tar-realtajiet li qed ngħixu fihom attwalment, nemmen li l-ispazji miftuħa u l-ġonna huma parti integrali mill-komunitajiet tagħna u għandhom rwol ċentrali f’ħajjitna. Għalhekk matul din is-sena sar investiment qawwi u xogħol estensiv ta’ tisbiħ u riġenerazzjoni f’diversi lokalitajiet fosthom fl-Imdina, San Ġwann, Birżebbuġa, in-Naxxar, ir-Rabat u Baħar iċ-Ċagħaq.

Tlestew ix-xogħlijiet fuq il-bandli tal-Imdina, iż-żona issa tinsab mgħammra b’bandli ġodda u faċilitajiet moderni  li se jżidu l-effiċjenza fl-enerġija. Din is-sena ġie ffirmat ukoll Memorandum of Understanding  bejn id-Dipartiment tax-Xogħlijiet Pubbliċi u l-Kunsill Lokali ta’ Birżebbuġa biex jittranġa Ġnien il-Kunsill tal-Ewropa.  B’dan il-ftehim, id-Dipartiment se jkun qed jipprovdi l-ħaddiema, il-materjal u s-servizzi għall-implimentazzjoni ta’ dan il-proġett. Ġie iffirmat ukoll Memorandum of Understanding bejn id-Dipartiment tax-Xogħlijiet Pubbliċi u l-Kunsill Lokali ta’ San Ġwann biex jitranġa Ġnien George Zarb u qed isir ukoll xogħol ta’ tisbiħ, rinovar u manutenzjoni tal-ħitan u l-binjiet ta’ Ġnien is-Serenità f’Santa Luċija.

Diversi minn dawn il-proġetti qed isiru possibbli wkoll bl-għajnuna ta’ fondi tal-Awtorità tal-Ippjanar. Fost l-ispazji miftuħa u ġonna li ġew inawgurati din is-sena nsibu l-outdoor gym fin-Naxxar fejn sit li kien abbandunat inbidel f’wieħed li issa se jintuża għall-eżerċizzju fiżiku, spazju miftuħ fil-qalba tar-Rabat magħruf bħala Ġnien Bir l-Iljun u spazju miftuħ f’Baħar iċ-Ċagħaq. Fl-istess waqt, komplejna nlestu aktar fażijiet fil-proġett  tal-Park Nazzjonali f’Ta’ Qali, wara li aktar kmieni din is-sena ġie inawgurat l-ispazju għall-Arti u t-Teatru biex jintuża għall-proġetti kulturali. Fiż-żmien li ġej mistenni jkun konkluż ukoll ix-xogħol fuq il-car park ta’ dan il-Park u titlesta’ l-concert area.

Dan huwa proġett għal qalbi ħafna li b’ħidma kollettiva ta’ ħafna nies qed joffri l-akbar spazju miftuħ għall-familji tagħna.

Proġett ambizzjuż ieħor li sar mill-ħaddiema tad-Dipartiment tax-Xogħlijiet Pubbliċi din is-sena huwa r-restawr u r-rikostruzzjoni tal-Mitħna tax-Xarolla fiż-Żurrieq għall-istat oriġinali tagħha. Dan wara li ġarrbet ħsarat kbar fil-maltempata f’Marzu 2022. Il-ħidma li saret fuq il-Mitħna tax-Xarolla turi l-impenn tal-Gvern ċentrali fil-konservazzjoni tal-wirt storiku ta’ pajjiżna.

Aktar kmieni din is-sena ħabbarna li se jiġi restawrat iz-zuntier tal-Knisja Arċipretali tas-Siġġiewi. Dan il-proġett mistenni jkun konkluż is-sena d-dieħla. Proġett ieħor mid-Dipartiment tax-Xogħlijiet Pubbliċi li mistenni jkun lest is-sena d-dieħla huwa r-restawr fuq tal-Funtana tal-Iljun tal-Floriana.

Mill-banda l-oħra, it-Taqsima tal-Ħarsien tal-Kosta fi ħdan id-Dipartiment tax-Xogħlijiet Pubbliċi se tkun qed tibda fost oħrajn proġett estensiv fil-bajja tal-Veccia f’San Pawl il-Baħar biex nipproteġu l-kosta mill-erożjoni li qed iseħħ b’ritmu mgħaġġel. L-għan jibqa’ li nħarsu l-kosta u anke l-propjetajiet li jmissu magħha f’dawn l-inħawi minn ħsara kkaġunata mill-elementi.

Dan ix-xogħol u dawn il-proġetti kollha ma jkunux jistgħu jsiru mingħajr il-ħidma sfieqa ta’ mijiet ta’ ħaddiema b’ħiliet u professjonijiet differenti li jaħdmu fid-Dipartiment tax-Xogħlijiet Pubbliċi. Il-ħidma li jagħmlu b’tant dedikazzjoni għall-ġid tal-komunità jixirqilha kull tifħir. Bħala Ministru għax-Xogħlijiet Pubbliċi u l-Ippjanar kommess li nkompli naħdem ukoll bl-għajnuna tal-Kunsilli Lokali u entitajiet oħra non-Governattivi biex noħolqu aktar proġetti sostenibbli għall-ġid tal-komunità fil-qalba tal-irħula u l-ibliet tagħna.

/by